संत गजानन महाराजांच्या पालखीचे गेवराईत उत्साहात स्वागत.

तालुका प्रतिनिधी मारोती गाडगे 

गेवराई (बीड):- आषाढी एकादशी निमित्ताने आषाढी वारीसाठी पंढरपूरच्या विठुरायाचे दर्शन घेवून शेगांवकडे परतीचा प्रवास करणाऱ्या श्री संत गजानन महाराजांच्या पालखीचे शुक्रवारी सायंकाळी गेवराई शहरात आगमन झाले. ठिकठिकाणी रांगोळी तसेच फुलांचा वर्षाव करत दिंडीचे मोठ्या भक्तीमय वातावरणात जल्लोषात उत्साहात स्वागत करुन जय गजानन श्री गजानन या जयघोषात गेवराई शहर दुमदुमून गेले होते. मिरवणूक मार्गावर पालखीचे ठिकठिकाणी राजकीय मंडळी, प्रशासकीय अधिकारी, कर्मचारी तसेच भक्तगण मंडळींच्या वतीने स्वागत करुन भक्तांनी भक्तीभावाने दर्शन घेतले. दरम्यान दिंडीत सहभागी असलेल्या वारकऱ्यांनी शिस्तीचे दर्शन घडविले. यावेळी गेवराई पोलिसांकडून चोख पोलीस बंदोबस्त ठेवण्यात आला होता.

        विदर्भाची पंढरी असलेल्या शेगांवच्या संत गजानन महाराजांची पालखी टाळ मृदंगाचा गजर करत शुक्रवार दि.१८ जुलै रोजी गेवराई शहरात आगमन झाले. भाविकांनी रांगोळी काढुन, फुलांची उधळण करत फटाके वाजवुन जल्लोषात स्वागत केले.पालखी शहरातील नवीन मार्केट कमिटी, मोंढा नाका, पंचायत समिती रोड, जुने बसस्थानक मार्गे शहरातील जिल्हा परिषद कन्या शाळेत विश्रांतीसाठी शुक्रवारी पालखीचा मुक्काम झाला. दरम्यान श्रीं'च्या पंढरपूर पालखी पायी वारीचे यंदा ५६ वे वर्ष आहे. श्री संत गजानन महाराज संस्थानने अखंडितपणे पायी वारीची परंपरा कायम ठेवली असून शेगांव येथील मंदिरातून दि.०२ जुन २०२५ रोजी प्रस्थान झालेल्या दिंडीचा प्रवास ७५० कि.मी. चालत वाटेत लागणाऱ्या नऊ जिल्ह्यातून प्रवास करत आषाढी एकादशीला पंढरपूरमध्ये दाखल होते. परतीचा प्रवास सुद्धा पायीच असतो. "श्रीं"च्या पालखी सोहळ्या सोबत भगव्या पताका खांद्यावर घेतलेले श्वेतवस्त्रधारी वारकरी, वाहन, घोडे, बँड पथक आदी वाद्यसह शिस्तबद्ध रांगा अशी तीर्थक्षेत्र पंढरपुर ते गेवराई पायी चालत प्रवास करीत शुक्रवारी पालखी शहरात आली, यावेळी पालखीचे ठिकठिकाणी जल्लोषात स्वागत करण्यात आले. शहरात प्रवेश होताच भक्तिमय वातावरणात हा परिसर हरिनामाच्या गजराने दुमदुमून गेला होता. शहरात ठिकठिकाणी वारकऱ्यांचे स्वागत करुन भाविकांनी भक्तिभावाने दर्शन घेतले. दरम्यान यावेळी गेवराई पोलिसांकडून चोख पोलीस बंदोबस्त ठेवण्यात आला होता.तर पालखी शहरातील विविध मार्गावरून जिल्हा परिषद कन्या प्रशालेत विश्रांतीसाठी मुक्कामी होती यावेळी "श्रीं"ची नित्यनेमा प्रमाणे आरती होवून भाविकांनी रांगेत दर्शन घेवून विविध धार्मिक कार्यक्रम पार पडले तर पालखी रात्री मुक्कामी थांबून शनिवारी सकाळी शहागड मार्गे पुढे शेगांवकडे प्रस्थान करणार आहे.