रायगडकरांचा भाजीपाला लागवडीवर भर

जिल्हा परिषद कृषी विभागाचा स्तुत्य उपक्रम; जिल्ह्यातील शेतकऱ्यांना उभारी देण्याचा प्रयत्न

अलिबाग(रत्नाकर पाटील) 

घरच्या घरी भाजीपाला लागवड करण्यासाठी रायगड जिल्हा परिषद कृषी विभागाने स्तुत्य उपक्रम हाती घेतला आहे. जिल्ह्यातील शेतकरी व महिला शेतकऱ्यांना उभारी देण्याचा प्रयत्न करण्यात आला आहे. यावेळी 10 हजारहून अधिक भाजीपाला किट शेतकऱ्यांना वितरीत करून भाजीपाला लागवडीवर भर दिला जाणार असल्याची माहिती कृषी अधिकारी आकाश यादव यांनी दिली आहे.

रायगड जिल्ह्यामध्ये भात लागवडीबरोबरच फळ पिकांची लागवड मोठ्या प्रमाणात केली जाते. पावसाळ्याच्या पाण्याचा फायदा भाजीपाला लागवडीसाठी व्हावा. घरच्या घरी विषमुक्त भाजीपाला लागवड करण्याची सवय नागरिकांना रहावी. तसेच, भाजीपाला लागवडीतून आर्थिक बळ शेतकऱ्यांसह महिला बचत गटांना मिळावे, यासाठी जिल्हा परिषद कृषी विभागामार्फत भाजीपाला लागवडीसाठी शेतकऱ्यांना प्रोत्साहन देण्याचे काम वेगवेगळ्या माध्यमातून केले जात आहे. शेतकरी सक्षम झाला पाहीजे, हा उद्देश समोर ठेवून कृषी विभागाने भातशेतीबरोबरच भाजीपाला, फळ पिकांची लागवड करण्यावर भर दिला आहे. त्याचाच एक भाग म्हणून शेतकऱ्यांना विशेष करून महिला शेतकऱ्यांना घरच्या घरी भाजीपाला लागवड करण्याची सवय निर्माण करण्यासाठी हे पाऊल कृषी विभागाने उचलले आहे. त्यासाठी महाबीज मार्फत सुमारे 10 लाख रुपयांचा निधी खर्च करण्यात आला असून महाबीजमार्फत वेगवेगळ्या भाजीपालांची बियाणांची 10 हजार किट घेण्यात आले आहे. जिल्ह्यातील शेतकऱ्यांना हे कीट मोफत वितरीत केले जाणार आहेत. घरासमोरील अथवा पडीक जागेच्या ठिकाणी जिल्ह्यातील शेतकऱ्यांना भाजीपाला लागवड करता यावा, यासाठी शेतकऱ्यांनी शेतकऱ्यांना भाजीपाला बियाण्यांचे कीट वाटप सुुरु केले आहे.

व्यवसायाला उभारी देण्याचा प्रयत्न

जिल्ह्यातील शेतकरी विशेष म्हणजे महिला बचत गटांना मोफत भाजीपाला किट देऊन त्यांच्यामार्फत भाजीपाला लागवड केली जाणार आहे. विषमुक्त भाजीपाला घरी खाण्याबरोबरच बाहेर बाजारातदेखील विक्री करता येणार आहे. पालक, भेंडी, दुधी, दोडका, भोपळा अशा वेगवेगळ्या प्रकारच्या भाजीच्या बियाणांचे कीट दिले जाणार आहे. पावसाळ्यात याची लागवड मोठ्या प्रमाणात झाल्यास व्यवसायाला उभारी देण्याचा प्रयत्न राहणार असल्याचे मोहिम अधिकारी महेश नारायणकर यांनी सांगितले आहे.