मराठा आरक्षणाच्या हक्कासाठी मनोज जरांगे पाटील यांची लढाई.

 

बिलोली प्रतिनिधी गणेश कदम.

मराठा समाज हा महाराष्ट्राच्या सामाजिक, राजकीय आणि सांस्कृतिक जीवनाचा कणा आहे. शिक्षण, शेती, नोकरी, उद्योग अशा प्रत्येक क्षेत्रात मराठा समाजाने मोलाचे योगदान दिले आहे. परंतु गेल्या अनेक दशकांपासून मराठा समाजाला न्याय्य हक्काच्या आरक्षणासाठी संघर्ष करावा लागत आहे. या संघर्षाला गती देणारे आणि प्रत्येक गावोगावी, प्रत्येक पिढीमध्ये जागरूकता निर्माण करणारे नेतृत्व म्हणजे मनोज जरांगे पाटील. जरांगे पाटील यांनी आरक्षणासाठी केवळ आंदोलनाची घोषणाबाजी केली नाही, तर समाजाशी संवाद साधला, लोकांची मते जाणून घेतली आणि त्यांना संघटित केले. 

आज मराठा समाजासमोरील प्रश्न केवळ नोकरी किंवा शिक्षणातील आरक्षणापुरते मर्यादित नाहीत; हा प्रश्न आत्मसन्मानाचा, न्याय्य हक्काचा आणि भविष्यातील सुरक्षिततेचा आहे. या प्रश्नाचा गांभीर्याने विचार करून समाजामध्ये एकजूट निर्माण करण्याचे काम त्यांनी मोठ्या प्रामाणिकपणे केले आहे. केवळ एक कार्यकर्ता म्हणून नव्हे, तर मराठा समाजाच्या जिव्हाळ्याच्या प्रश्नाचा प्रतिनिधी म्हणून. मुंबईतील सरकारपुढे समाजाची व्यथा आणि हक्क मांडण्याचा त्यांचा निर्धार ही संपूर्ण समाजासाठी आशेची किरण ठरत आहे. त्यांच्या प्रवासात अनेक गावांमध्ये झालेल्या बैठका, कार्यकर्त्यांचा प्रचंड उत्साह आणि युवक-शेतकऱ्यांचा पाठिंबा पाहता, ही लढाई केवळ एक व्यक्तीची नाही तर संपूर्ण समाजाची बनली आहे, हे स्पष्ट होते. मनोज जरांगे पाटील यांची कामगिरी समाजाला एकत्र आणण्याची आहे. त्यांचा आवाज सामान्य माणसाच्या मनाला भिडतो, कारण ते केवळ नेते म्हणून बोलत नाहीत, तर एक शेतकऱ्याचा मुलगा म्हणून, एक मराठा तरुण म्हणून बोलतात. हीच त्यांची ताकद आहे मराठा समाजाच्या अपेक्षा त्यांच्या सोबत आहेत. त्यामुळे सरकारने समाजाच्या भावना ओळखून, न्याय्य तोडगा काढणे अत्यंत आवश्यक आहे. मराठा आरक्षण हा केवळ कायदेशीर किंवा राजकीय प्रश्न नाही, तर तो सामाजिक न्यायाचा प्रश्न आहे. या प्रश्नाला न्याय मिळवून देण्यासाठी ज्या पद्धतीने मनोज जरांगे पाटील सारखे तरुण नेते पुढे येत आहेत, तेवढेच मराठा समाजाच्या उज्ज्वल भविष्यासाठी महत्त्वाचे आहे.