माजलगाव तालुक्यातील गोविंदपूर या छोट्याशा गावामध्ये भीषण दुष्काळाचे परिणाम आता स्पष्टपणे जाणवू लागले आहेत. पावसाअभावी शेतीची कामे ठप्प झाली असून, शेतकरी आणि शेतमजूर आर्थिक संकटात सापडले आहेत. गावातील मजुरांच्या हाताला काम मिळत नसल्याने अनेक कुटुंबांवर उपासमारीची वेळ येण्याची भीती निर्माण झाली आहे.
शेती हा ग्रामीण भागातील नागरिकांचा प्रमुख उदरनिर्वाहाचा आधार आहे. मात्र, पावसाने पाठ फिरवल्यामुळे पिकांचे नुकसान झाले असून, शेतात कामे नसल्याने मजुरांना रोजगारासाठी भटकंती करावी लागत आहे. रोजंदारीवर कुटुंबाचा उदरनिर्वाह करणाऱ्या मजुरांसमोर घरखर्च, मुलांचे शिक्षण आणि दैनंदिन गरजा भागवण्याचे मोठे आव्हान उभे राहिले आहे.
या गंभीर परिस्थितीत शासनाने गोविंदपूर गावातील दुष्काळी परिस्थितीची पाहणी करून रोजगार हमीची कामे तातडीने सुरू करावीत, तसेच गरजू कुटुंबांना आवश्यक ती मदत उपलब्ध करून द्यावी, अशी मागणी ग्रामस्थांकडून केली जात आहे.
दुष्काळाच्या संकटातून गावकऱ्यांना दिलासा मिळणार का? असा प्रश्न आता उपस्थित होत आहे.
Social Plugin