प्रोग्रेसिव्ह कॉन्व्हेंट स्कूल अँड ज्युनिअर कॉलेजच्या प्रांगणात दुमदुमला विठ्ठल नामाचा गजर....

प्रतिनिधी प्रशांत सोनवणे

फलटण दि.१० (कोळकी) सरस्वती शिक्षण संस्था संचलित प्रोग्रेसिव्ह कॉन्व्हेंट स्कूल अँड ज्युनिअर कॉलेज, कोळकी , फलटण या प्रशालेत संतश्रेष्ठ श्री ज्ञानेश्वर महाराज पायी पालखी दिंडी सोहळ्याच्या(आषाढी वारी)  फलटण मधील आगमनाच्या पार्श्वभूमीवर पालखी दिंडी सोहळ्याचे आयोजन अतिशय भक्तीमय व चैतन्यपूर्ण वातावरणात  सोमवार दिनांक ०८ जुलै रोजी करण्यात आले होते.कार्यक्रमाची सुरूवात स्वागत गीताने करण्यात आली.

त्यानंतर विद्येची देवता सरस्वती श्री विठ्ठल - रखुमाई ,संतश्रेष्ठ श्री ज्ञानेश्वर महाराज व  जगतगुरू श्री तुकाराम महाराज यांच्या प्रतिमांचे व पालखीचे पूजन तसेच दीपप्रज्वलन सोहळ्याचे प्रमुख अतिथी मा.श्री रविंद्र येवले सर व अध्यक्ष ज्येष्ठ पत्रकार मा.श्री अरविंदभाई मेहता यांच्या हस्ते झाले.त्यानंतर सर्व उपस्थित मान्यवरांचे प्रशालेच्या वतीने  रोपे देऊन सहर्ष स्वागत करण्यात आले.

इयत्ता प्राथमिक विभागाच्या  विद्यार्थ्यांनी आपल्या मधुर आवाजात संत तुकाराम व संत बहिणाबाई यांच्या अभंगांसह भजनांचे उत्कृष्ट सादरीकरण केले.इ.4 थी व इ.6 वी च्या  विद्यार्थ्यांनी उत्तम अभिनयासह प्रबोधनपर भारूडे सादर करून तापमान वाढ कमी करून पर्यावणाचा समतोल राखण्यासाठी वृक्षसंवर्धन व  प्रत्येकाने किमान एक झाडे लावण्याचा संदेश दिला.

यानंतर इयत्ता सहावी ते आठवी च्या विद्यार्थ्यीनींनी माऊली... माऊली या गीतावर उत्कृष्ट नृत्य  केले आणि विद्यार्थ्यांनी चांदोबाचा लिंब येथील गोल रिंगणाचं सुंदर प्रात्यक्षिक सादर करून दाखवले.यावेळी प्रोग्रेसिव्हचे  प्रांगण टाळ - मृदूंगाच्या आवाजात आणि ज्ञानोबा माऊली तुकारामांसह विठ्ठल नामाच्या जयघोषात दुमदुमून गेला.या सोहळ्यामध्ये विद्यार्थी श्री.विठ्ठल - रखुमाई,संत ज्ञानेश्वर महाराज ,संत तुकाराम महाराज,संत मुक्ताबाई,संत सोपान महाराज, संत निवृत्ती महाराज, संत मीराबाई,संत जनाबाई,संत बहिणाबाई,संत एकनाथ महाराज अशा विविध संतासह, वासुदेव आणि वारक-यांच्या पारंपारिक वेशभूषेत भगव्या पताका हाती घेऊन सहभागी झाले होते.त्यानंतर प्रोग्रेसिव्ह च्या प्रांगणात हरिनामाच्या जयघोषात   पालखीची प्रदक्षिणा संपन्न झाली.यावेळी बालवारक-यांसह शिक्षक व पालकांनी फुगडी खेळण्याचा आनंद लुटला.

 प्रमुख पाहुणे मा.प्राचार्य श्री. रविंद्र येवले सर यांनी आपल्या मनोगतामध्ये या बालवारक-यांच्या पालखी सोहळ्याचे विशेष कौतुक करून साक्षात संतांच्या मांदियाळीसह अवघी पंढरी या प्रांगणात अवतरल्याचे गौरवोद्गार काढले.तसेच उपस्थितांना आषाढी वारीचे महत्त्व व महात्म्य सांगितले. यावेळी अध्यक्ष म्हणून  ज्येष्ठ पत्रकार श्री.अरविंदभाई मेहता,सरस्वती शिक्षण संस्थेच्या व्यवस्थापकीय संचालिका सौ.संध्या गायकवाड, मा.सरपंच  सौ.रेश्मा देशमुख ,लायन्स क्लब ऑफ फलटण गोल्डनच्या सौ.स्वाती चोरमले,सौ.निलम देशमुख, सौ.उज्वला निंबाळकर,सौ.सुनिता कदम या  सर्व पदाधिकारी, प्रशालेचे  प्राचार्य अमित सस्ते, पर्यवेक्षक महेंद्र कातुरे, समन्वयिका  सौ.माधुरी काटकर, सौ.सुजाता गायकवाड, सर्व शिक्षक व शिक्षकेत्तर कर्मचारी विद्यार्थी उपस्थित होते.त्याचबरोबर या सोहळ्यामध्ये पालकांनीही उस्फूर्तपणे उपस्थिती दर्शविली.कार्यक्रमाचे सुत्रसंचालन    कु.समिक्षा सोनवलकर व कु.प्रगती ननावरे या विद्यार्थ्यांनींनी केले तसेच आभार शिक्षिका सौ.जयश्री घाडगे यांनी केले.यावेळी प्रशालेच्या प्रांगणात वृक्षारोपणही करण्यात आले.