पुसेगावमध्ये मानाचा झेंडा, पालखीची भव्य मिरवणूक,श्री सेवागिरी महाराज की जय'च्या घोषात यात्रेस उत्साहात प्रारंभ.

बुध  दि. १४ (प्रकाश राजेघाटगे) 

पुसेगाव, ता. खटाव येथील प. पू. श्री सेवागिरी महाराजांच्या ७८व्या पुण्यस्मरणानिमित्त वार्षिक यात्रेची सुरुवात रविवारी पालखी व मानाचा झेंडयाच्या भव्य मिरवणुकीने, 'श्री सेवागिरी महाराज की जयच्या घोषात, ढोल-ताशा, लेझीम, बँडपथक, तुतारी व झांजपथकांच्या निनादात, भक्तिमय आणि उत्साही वातावरणात झाली, रविवार, दि १४ ते बुधवार, दि. २४ जानेवारी  या कालावधीत शासकीय विद्यानिकेतनच्या परिसरात आणि सातारा-पंढरपूर रस्त्याच्या दुतर्फा यात्रा भरण्यास सुरुवात झाली आहे.

या यात्रेस महाराष्ट्र, उत्तर कर्नाटक, गुजरात व आंध्र प्रदेशसह इतर राज्यांमधून नऊ ते दहा लाख भाविक येतात. श्री सेवागिरी देवस्थानचे मठाधिपती प. पू. सुंदरगिरी महाराज, सहाय्यक पोलीस निरीक्षक संदिप पोमण , ट्रस्टचे चेअरमन  संतोष वाघ , विश्वस्त डॉ . सुरेश जाधव, रणधीर  जाधव, संतोष तर्फ बाळासाहेब जाधव, सचिन देशमुख, गौरव जाधव यांच्या हस्ते सकाळी ९ वाजता मानाचा झेंडा व श्री सेवागिरी महाराजांच्या पालखीचे विधिवत पूजन करण्यात आले. यावेळी  बारामती अँग्रीकलचरचे चेअरमन राजेंद्र दादा पवार , युवानेते सुशांत निंबाळकर , ह.भ.प. सुरेश सुळ ,ग्रामस्थ व भाविक उपस्थित होते. 

पूजनानंतर झेंडा व पालखी मिरवणुकीला मंदिरापासून सुरुवात झाली. भाविक आणि ग्रामस्थांनी जागोजागी मानाचा झेंडा व पालखीचे मनोभावे दर्शन घेत श्री सेवागिरी महाराज की जयच्या घोषणा दिल्या. मुख्य बाजारपेठेतून निघालेल्या श्री सेवागिरी महाराजांच्या मानाचा झेंडा व पालखी मिरवणुकीसमोर श्री हनुमानगिरी हायस्कूल व ज्युनिअर कॉलेज, श्री सेवागिरी विद्यालय, कला व वाणिज्य महाविद्यालय, इंदिरा गांधी कन्या प्रशाला, जिल्हा परिषद प्राथमिक शाळा, इंग्लिश मीडियम स्कूलचे विद्यार्थी, झांजपथक व लेझीमपथके सहभागी झाली होती. विद्याथ्यांनी आकर्षक पोशाख परिधान करून, सादर केलेले सामाजिक देखावे लक्षवेधक ठरले. मिरवणुकीनंतर मानाचा झेंड्याची  यात्रा स्थळावर प्रतिष्ठापना करण्यात आली.