बिरोबावाडीत राजकीय समीकरणे बदलणार?

चुरशीच्या मतदानासोबतच 'दोन्ही गट एकाच छताखाली' आल्याने चर्चेला उधाण!

पाटस प्रतिनिधी-गणेश गावडे

​पाटस/बिरोबावाडी: पुणे जिल्ह्यातील पाटस-कुरकुंभ जिल्हा परिषद गट आणि पाटस पंचायत समिती गणांतर्गत येणाऱ्या बिरोबावाडी गावात नुकतेच उत्साहात मतदान पार पडले. या निवडणुकीत एकूण ६३.५० टक्के मतदान झाले असून, मतदानाच्या आकडेवारीपेक्षाही गावातील राजकीय चित्र अधिक चर्चेचा विषय ठरले आहे. निवडणुकीच्या रणधुमाळीत एकमेकांचे कट्टर प्रतिस्पर्धी मानले जाणारे दोन्ही राजकीय गट एकाच छताखाली एकत्र बसल्याचे पाहायला मिळाल्याने राजकीय वर्तुळात अनेक तर्कवितर्क लढवले जात आहेत. बिरोबावाडी गावची एकूण मतदार संख्या १४०३ असून, त्यापैकी ८९१ मतदारांनी आपला हक्क बजावला. यामध्ये पुरुष मतदारांचा कल अधिक दिसून आला.

​एकूण मतदार: १४०३

झालेले मतदान: ८९१ (६३.५०%)

​पुरुष मतदार: ७२० पैकी ४९९ जणांचे मतदान.

​महिला मतदार: ६८३ पैकी ३९२ जणांचे मतदान. 

​प्रमुख लढतींकडे जिल्ह्याचे लक्ष:

जिल्हा परिषद आणि पंचायत समितीसाठी राष्ट्रवादी काँग्रेस आणि भाजपमध्ये थेट संघर्ष पाहायला मिळत आहे.

१. जिल्हा परिषद गट: राष्ट्रवादीच्या अनुराधाताई शितोळे विरुद्ध भाजपच्या वैशालीताई वाबळे अशी हायव्होल्टेज लढत होत आहे.

२. पंचायत समिती गण: राष्ट्रवादीचे शिवाजी ढमाले आणि भाजपचे नितीन शितोळे यांच्यात प्रतिष्ठा पणाला लागली आहे.

​'त्या' एका घटनेने वेधले सर्वांचे लक्ष:

निवडणुकीच्या दिवशी मतदान केंद्राच्या परिसरात किंवा गावात राजकीय ईर्षा अपेक्षित असताना, दोन्ही प्रतिस्पर्धी गटांचे कार्यकर्ते आणि नेते एकाच छताखाली एकत्र बसलेले पाहायला मिळाले. "दोन्ही गट एकाच छताखाली बसल्याचे पाहायला मिळाले" या एका घटनेमुळे सामान्य मतदारांमध्ये संभ्रमाचे आणि कुतूहलाचे वातावरण निर्माण झाले आहे. ही केवळ राजकीय सुसंस्कृतता आहे की निकालांनंतरच्या नव्या समीकरणांची ही नांदी, यावर आता ठिकठिकाणी खमंग चर्चा रंगत आहेत.

​आता या छुप्या राजकीय हालचालींचा आणि झालेल्या मतदानाचा कौल कोणाच्या बाजूने लागणार, हे निकालाअंतीच स्पष्ट होईल.