जिल्हा परिषद प्राथमिक शाळा भवानीनगरचा ‘बालबाजार’ उत्साहात संपन्न.

बुध दि . [प्रकाश राजेघाटगे ]

 पुसेगाव ता. खटाव येथील भवानीनगर जिल्हा परिषद प्राथमिक शाळेत विद्यार्थ्यांच्या सर्वांगीण विकासाच्या उद्देशाने आयोजित करण्यात आलेला ‘बालबाजार’ उपक्रम उत्साहात आणि आनंदी वातावरणात पार पडला. अभ्यासाबरोबरच विद्यार्थ्यांना व्यवहाराचे ज्ञान मिळावे, पैशांचे व्यवस्थापन समजावे आणि आत्मविश्वास वाढावा हा या उपक्रमामागील मुख्य हेतू होता.

बालबाजारात लहानग्या विद्यार्थ्यांनी स्वतः आणलेला ताजा भाजीपाला, फळे तसेच विविध प्रकारचा खाऊ यांचे आकर्षक स्टॉल लावले होते. विद्यार्थ्यांनी ग्राहकांना वस्तूंची माहिती देत विक्री केली. या वेळी पालक आणि ग्रामस्थांनी मोठ्या उत्साहाने उपस्थित राहून विद्यार्थ्यांकडून खरेदी केली व त्यांना प्रोत्साहन दिले. ग्रामस्थांच्या उत्स्फूर्त प्रतिसादामुळे बाजाराला जत्रेचे स्वरूप प्राप्त झाले होते.

या उपक्रमात पारंपरिक वेशभूषेत सजलेल्या लहान मुलींनी विशेष आकर्षण ठरले. त्यांच्या देखण्या साजशृंगारामुळे बालबाजाराची शोभा अधिकच खुलून दिसली. विद्यार्थ्यांमध्ये जबाबदारीची जाणीव, संवाद कौशल्य, गणिती व्यवहार आणि संघभावना विकसित करण्यासाठी हा उपक्रम महत्त्वपूर्ण ठरला.

शाळेच्या मुख्याध्यापकांनी या उपक्रमामागील उद्दिष्ट स्पष्ट करताना सांगितले की, “विद्यार्थ्यांनी केवळ पुस्तकापुरते शिक्षण न घेता प्रत्यक्ष जीवनातील व्यवहार समजून घ्यावा, हा या बालबाजाराचा मुख्य हेतू आहे.” शिक्षकांनीही विद्यार्थ्यांना मार्गदर्शन करून उपक्रम यशस्वी करण्यासाठी परिश्रम घेतले.

 या कार्यक्रमासाठी शाळा व्यवस्थापन समितीचे अध्यक्ष विशाल जाधव. मुख्याध्यापक ननावरे सर, वरिष्ठ मुख्याध्यापक कर्पे सर व सर्व शिक्षक आणि ग्रामस्थ उपस्थित होते.एकूणच, शैक्षणिक उपक्रमांना व्यवहारज्ञानाची जोड देणारा हा बालबाजार विद्यार्थ्यांसाठी संस्मरणीय अनुभव ठरला असून पालक व ग्रामस्थांकडून या अभिनव उपक्रमाचे कौतुक करण्यात आले.

बालबाजार पूर्णपणे प्लास्टिकमुक्त

जिल्हा परिषद प्राथमिक शाळा भवानीनगर येथे आयोजित करण्यात आलेला बालबाजार हा पूर्णपणे प्लास्टिकमुक्त स्वरूपात पार पडला. पर्यावरण संवर्धनाचा संदेश देत विद्यार्थ्यांनी कापडी पिशव्या, कागदी पिशव्या व पुनर्वापर करता येणाऱ्या साहित्याचा वापर केला.या उपक्रमादरम्यान ग्रामपंचायत अधिकारी श्री. ए.जे.नागरगोजे यांनी उपस्थितांना प्लास्टिकमुक्तीबाबत मार्गदर्शन केले. “प्लास्टिकचा वापर टाळा आणि पर्यावरणपूरक पर्याय स्वीकारा,” असे आवाहन त्यांनी केले.