**टाकळी बुद्रुकची लेक प्रांजल कोळी हिची मुंबई पोलिसात निवड; गावकऱ्यांकडून भव्य सत्कार!

महाराष्ट्र ग्रामीण न्यूज/गणेश जाधव जामनेर  

जामनेर (प्रतिनिधी): दिनांक29/5/2026. अत्यंत गरीब परिस्थितीवर मात करत, केवळ जिद्द, चिकाटी आणि कठोर मेहनतीच्या बळावर टाकळी बुद्रुक (ता. जामनेर) येथील कुमारी प्रांजल सुरेश कोळी हिने मुंबई पोलीस भरतीमध्ये घवघवीत यश संपादन केले आहे. तिची महाराष्ट्र पोलीस दलात निवड झाल्याबद्दल संपूर्ण परिसरात आनंदाचे वातावरण असून, टाकळी बुद्रुक गावाची 'पहिली महिला पोलीस' होण्याचा बहुमान तिने पटकावला आहे. या ऐतिहासिक यशाबद्दल टाकळी बुद्रुक ग्रामस्थांच्या वतीने तिचा गावात जाहीर व भव्य सत्कार करण्यात आला.

जिद्दीने कष्टावर मात करत मिळवले यश

प्रांजलची घरची परिस्थिती अत्यंत हलाखीची असतानाही, तिने पोलीस होण्याचे आपले स्वप्न डोळ्यासमोर ठेवून अहोरात्र मेहनत घेतली. कोणत्याही प्रतिकूल परिस्थितीला शरण न जाता तिने मिळवलेले हे यश केवळ तिच्या कुटुंबासाठीच नव्हे, तर संपूर्ण जामनेर तालुक्यासाठी अभिमानास्पद ठरले आहे.

गावकऱ्यांकडून कौतुकाचा वर्षाव आणि सत्कार

प्रांजलच्या या यशाची दखल घेत टाकळी बुद्रुक येथील ग्रामस्थ आणि लोकप्रतिनिधींनी एकत्र येत तिचा विशेष नागरी सत्कार केला. यावेळी गावातील लोकनियुक्त सरपंच सौ वंदना भाऊराव मोरे टाकळी बुद्रुक व लोकनियुक्त सरपंच टाकळी खुर्द जितेंद्र भाऊ माळी व दोघे गावातील उपसरपंच व ग्रामपंचायत सदस्य व इतर मान्यवर व ज्येष्ठ नागरिक, तरुण मंडळी आणि महिला मोठ्या संख्येने उपस्थित होत्या. "प्रांजलने अत्यंत प्रतिकूल परिस्थितीत मिळवलेले हे यश गावातील इतर तरुण-तरुणींसाठी आणि स्पर्धा परीक्षेची तयारी करणाऱ्या विद्यार्थ्यांसाठी अत्यंत प्रेरणादायी ठरेल," अशा भावना गावकऱ्यांनी सत्कार प्रसंगी व्यक्त केल्या.

'*महाराष्ट्र ग्रामीण न्यूज,*'कडून हार्दिक शुभेच्छा!

टाकळी बुद्रुकचे नाव सुवर्णाक्षरांनी रोशन करणाऱ्या आणि गावातील पहिली महिला पोलीस  बनणाऱ्या कुमारी प्रांजल सुरेश कोळी हिच्या या यशाबद्दल आणि पुढील भावी वाटचालीस 'महाराष्ट्र ग्रामीण न्यूज' परिवारातर्फे मनापासून हार्दिक शुभेच्छा! तिची ही यशोगाथा अशीच पुढेही यशस्वीपणे सुरू राहो, हीच सदिच्छा.