वाळू माफियांच्या राक्षसी हव्यासापायी निष्पाप 'फिरदौस'चा बळी

 प्रशासनाच्या सुस्तीविरोधात शिकलगार समाज आक्रमक, आंदोलनाचा इशारा! संघटनेचे अध्यक्ष नौशाद शिकलगार आंदोलनास बसणार!

बुध  दि [प्रकाश राजेघाटगे  ] 

खानापूर तालुक्यातील भाळवणी येथे वाळू माफियांच्या बेकायदेशीर कृत्यामुळे एका निष्पाप तरुणीला आपला जीव गमवावा लागल्याची अत्यंत धक्कादायक आणि चीड आणणारी घटना समोर आली आहे. कोरेगाव जिल्हा सातारा येथील रहिवासी असलेली फिरदौस झाकीर शिकलगार ही तरुणी २ मे रोजी भाळवणी येथे आपल्या नातेवाईकांकडे एका कार्यक्रमासाठी आली होती. मात्र, येथील येरळा नदीपात्रात वाळू माफियांनी केलेल्या अवाढव्य आणि खोल खड्ड्यांमुळे तिचा बुडून दुर्दैवी मृत्यू झाला. या घटनेला दीड महिना उलटून गेला तरीही प्रशासनाने कोणतीही ठोस कारवाई न केल्यामुळे संपूर्ण शिकलगार समाजात तीव्र संतापाची लाट उसळली असून, आता प्रशासनाविरोधात आरपारची लढाई लढण्याचे नियोजन करण्यात आले असून न्याय न मिळाल्यास संघटनेचे अध्यक्ष नौशाद शिकलगार उपोषणास बसणार!

काय आहे नेमके प्रकरण?

मिळालेल्या माहितीनुसार, २ मे रोजी फिरदौस शिकलगार ही भाळवणी येथील नदीपात्रात गेली असता, नदीमध्ये वाळू माफियांनी बेसुमार आणि बेकायदेशीर वाळू उपसा करून प्रचंड मोठे व खोल खड्डे करून ठेवले होते. पाण्याच्या प्रवाहात हे खड्डे न दिसल्यामुळे फिरदौसचा अंदाज चुकला आणि ती या जीवघेण्या खड्ड्यात बुडाली. या संपूर्ण घटनेला नदीचे नैसर्गिक स्वरूप नष्ट करणारे आणि कायद्याला धाब्यावर बसवणारे वाळू माफियाच सर्वस्वी जबाबदार आहेत. या घटनेत शफक रशिद शिकलगार (वय ७ वर्षे) ही चिमुरडीही गंभीर जखमी झाली असून, तिच्यावर अतिदक्षता विभागात (ICU) उपचार सुरू आहेत.

 'शिकलगार जमात ट्रस्ट'चे तहसीलदारांना निवेदन, पण प्रशासन सुस्त!

या घटनेनंतर 'शिकलगार जमात ट्रस्ट, मुंबई' आणि सांगली जिल्हा संघटनेच्या वतीने खानापूर (विटा) चे तहसीलदार साहेब यांना ६ मे २०२६ रोजीच लेखी निवेदन (Ref. No. 003/2026) देण्यात आले होते. या निवेदनात स्पष्ट नमूद केले होते की, *"हा केवळ अपघात नसून, नदीपात्रात सुरू असलेल्या बेकायदेशीर व बेसुमार वाळू उपशामुळे निर्माण झालेल्या धोकादायक परिस्थितीचा हा थेट परिणाम आहे."* संबंधित वाळू माफिया आणि त्यांच्या कंपन्यांची चौकशी करून त्यांच्यावर तातडीने गुन्हे दाखल करावेत, तसेच मृत फिरदौसच्या कुटुंबाची आर्थिक परिस्थिती बेताची असल्याने शासनाने तात्काळ आर्थिक मदत (भरपाई) द्यावी, अशी मागणी करण्यात आली होती.

परंतु, निवेदनावर सही-शिक्का घेऊन दीड महिना झाला, तरीही प्रशासनाने यावर कोणतीही कठोर कारवाई केलेली नाही. प्रशासनाच्या या ढिसाळ आणि उदासीन कारभारामुळे वाळू माफियांचे धाडस अधिकच वाढताना दिसत आहे.

"इंसाफ चाहिए!" – शिकलगार समाज एकवटला, आंदोलनाची ठिणगी!

प्रशासनाकडून कोणताही न्याय न मिळाल्यामुळे, काल दिनांक २१ जून रोजी भाळवणी येथे शिकलगार समाजाच्या प्रमुख कार्यकर्त्यांची आणि पदाधिकाऱ्यांची एक तातडीची बैठक पार पडली. **"इंसाफ में देरी, इंसाफ से इंकार!"** (न्यायाला होणारा उशीर म्हणजेच न्याय नाकारणे) अशी भूमिका घेत समाजातील नेत्यांनी प्रशासनाविरोधात तीव्र संताप व्यक्त केला.

या बैठकीत **#JusticeForFirdousZakirShikalgar**""जस्टीस फॉर फिरदोस" या मोहिमेची घोषणा करण्यात आली असून, फिरदौसला न्याय मिळवून देण्यासाठी आणि तिच्या कुटुंबाला हक्काची भरपाई मिळेपर्यंत गप्प न बसण्याचा निर्धार करण्यात आला आहे. "एक बेटी की पुकार, पूरे समाज की जिम्मेदारी... न चुप रहेंगे, न अन्याय सहेंगे!" अशी घोषणा देत शिकलगार समाजाने पुढील तीव्र आंदोलनाची रूपरेषा आखली आहे.

 आमचे थेट सवाल

१. एका निष्पाप मुलीचा जीव जाऊन दीड महिना झाला, तरीही वाळू माफियांवर गुन्हे दाखल का झाले नाहीत? प्रशासन कोणाला पाठीशी घालत आहे?

२. येरळा नदीचे नैसर्गिक स्वरूप बदलून सामान्य नागरिकांसाठी ती जीवघेणी बनवणाऱ्या कंपन्यांचे परवाने रद्द का केले गेले नाहीत?

३. मृत फिरदौसच्या गरीब कुटुंबाला शासनाने अद्याप आर्थिक मदत का जाहीर केली नाही?

जर प्रशासनाने लवकरात लवकर संबंधित दोषींवर सदोष मनुष्यवधाचे गुन्हे दाखल केले नाहीत आणि पीडित कुटुंबाला न्याय दिला नाही, तर होणाऱ्या तीव्र आंदोलनाला आणि कायदा-सुव्यवस्थेच्या परिस्थितीला पूर्णपणे तालुका प्रशासन व वाळू माफियाच जबाबदार असतील, असा खणखणीत इशारा शिकलगार समाजाच्या वतीने देण्यात आला आहे.