दौंड आणि श्रीगोंद्यात एकाच रात्री ५ ठिकाणी सशस्त्र दरोडे टाकणारी आंतरजिल्हा टोळी जेरबंद

२५ लाखांचा मुद्देमाल जप्त, २० गंभीर गुन्हे उघड* 

 *पाटस प्रतिनिधीःगणेश गावडे* 

दौंड/पुणेःएकाच रात्री पाच वेगवेगळ्या ठिकाणी सशस्त्र दरोडे टाकून धुमाकूळ घालणाऱ्या आंतरजिल्हा दरोडेखोर टोळीचा पुणे ग्रामीण पोलिसांच्या स्थानिक गुन्हे शाखा (LCB) आणि दौंड पोलिसांनी संयुक्त कारवाई करत पर्दाफाश केला आहे. या धडक कारवाईत पोलिसांनी तीन सराईत आरोपींसह एका विधीसंघर्षित बालकाला (नाबालिग) ताब्यात घेतले असून, त्यांच्याकडून तब्बल २५ लाख रुपयांचा मुद्देमाल हस्तगत केला आहे. या टोळीच्या अटकेमुळे पुणे आणि अहमदनगर जिल्ह्यातील दरोडा, जबरी चोरी आणि घरफोडीचे एकूण २० गंभीर गुन्हे उघडकीस आले आहेत.

 *एकाच रात्री पाच ठिकाणी घातला होता धुमाकूळ* 

पोलिसांनी दिलेल्या माहितीनुसार, १० जून २०२६ रोजी मध्यरात्रीच्या सुमारास दरोडेखोरांच्या या टोळीने दौंड तालुक्यातील खोरवडी परिसरातील बाबीरनगर, आवडेवस्ती, आवाळेवस्ती या चार ठिकाणी आणि श्रीगोंदा पोलीस ठाण्याच्या हद्दीतील एका ठिकाणी अशा एकूण पाच ठिकाणी सशस्त्र दरोडे टाकले होते. ६ ते ७ दरोडेखोरांच्या या टोळीने हातात घातक शस्त्रे बाळगून नागरिकांना मारहाण केली आणि त्यांच्यावर शस्त्रांचा धाक दाखवत दहशत निर्माण केली होती. या दरोड्यांमध्ये त्यांनी सोन्याचे दागिने, रोख रक्कम, मोबाईल फोन आणि दुचाकी असा एकूण ७ लाख १० हजार रुपयांचा ऐवज लुटून नेला होता. याप्रकरणी दौंड पोलीस ठाण्यात गुन्हा दाखल करण्यात आला होता.

*५० किलोमीटर परिसरातील CCTV फुटेज आणि तांत्रिक तपासावरून लागला छडा

 घटनेचे गांभीर्य लक्षात घेऊन पुणे ग्रामीणचे पोलीस अधीक्षक (SP) संदीप सिंह गिल यांनी तातडीने स्थानिक गुन्हे शाखा व उपविभागीय पोलिसांचे विशेष पथक तयार करून तपास करण्याचे आदेश दिले होते. पोलिसांनी गुन्ह्याची पद्धत (Modus Operandi), आरोपींच्या हालचाली, सीसीटीव्ही फुटेज आणि तांत्रिक विश्लेषणाच्या आधारे तपासाची चक्रे फिरवली. घटनास्थळापासून सुमारे ५० किलोमीटर परिसरातील सीसीटीव्ही फुटेजची कसून तपासणी केल्यानंतर, संशयित आरोपी हे अहमदनगर जिल्ह्यातील असल्याचे निष्पन्न झाले.

 *शेतात आणि माळरानावर लपणाऱ्या आरोपींना बेड्या* पोलिसांनी तातडीने शोधमोहीम राबवून अत्यंत शिताफीने आरोपींना अटक केली. अटक करण्यात आलेल्या आरोपींची नावे खालीलप्रमाणे आहेत:

१. गणेश मंगेश काळे (वय २२, रा. कुळधरण, ता. कर्जत, जि. अहमदनगर)

२. विशाल हंबरड्या काळे (वय २१, रा. चिखली, ता. आष्टी, जि. बीड)

३. किशोर रावण भोसले (वय १९, रा. बाभुळगाव खालसा, ता. कर्जत, जि. अहमदनगर)

यांच्यासोबतच एका विधीसंघर्षित बालकालाही ताब्यात घेण्यात आले आहे. हे आरोपी पोलिसांना चकवा देण्यासाठी मानवी वस्तीत न राहता शेतात, माळरानावर आणि वेगवेगळ्या निर्जन ठिकाणी वास्तव्य करत होते. मात्र, पोलिसांनी त्यांच्या छुप्या ठिकाणांचा शोध घेऊन त्यांना बेड्या ठोकल्या.

 *पुणे आणि नगर जिल्ह्यातील २० गुन्हे उघड, २५ लाखांचा मुद्देमाल जप्त* 

आरोपींची कसून चौकशी केली असता त्यांनी पुणे ग्रामीण आणि अहमदनगर जिल्ह्यातील अनेक दरोडे, जबरी चोऱ्या आणि घरफोड्यांची कबुली दिली आहे. या टोळीने दौंड, बारामती, यवत, जुन्नर, माळेगाव आणि आळेफाटा परिसरात केलेले गुन्हे उघडकीस आले आहेत. यामध्ये प्रामुख्याने:४ दरोडे६ जबरी चोरीचे गुन्हे५ घरफोड्या

असे पुणे जिल्ह्यातील १५ गुन्हे उघड झाले आहेत, तर अहमदनगर जिल्ह्यातील आणखी ८ गुन्ह्यांची उकल करण्यात पोलिसांना यश आले आहे.

पोलिसांनी या आरोपींकडून सुमारे १७ तोळे सोन्याचे दागिने, ३२४ ग्रॅम चांदीचे दागिने आणि इतर साहित्य असा एकूण २५ लाख रुपयांचा मुद्देमाल जप्त केला आहे. आरोपींना न्यायालयाने पोलीस कोठडी सुनावली असून, या टोळीतील इतर फरार साथीदारांचा शोध घेण्यासाठी पोलिसांचे तपास पथक रवाना झाले आहे.

 *या पथकाने केली कामगिरी* 

पोलीस अधीक्षक संदीप सिंह गिल यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, दौंड पोलीस ठाण्याचे पोलीस निरीक्षक हेमंत शेडगे तसेच स्थानिक गुन्हे शाखा आणि दौंड पोलिसांच्या विशेष पथकातील अंमलदारांनी या कामगिरीत महत्त्वाची भूमिका बजावली. या धडक कारवाईमुळे पुणे ग्रामीण आणि अहमदनगर जिल्ह्यातील नागरिकांनी सुटकेचा श्वास सोडला असून पोलीस दलाचे कौतुक होत आहे.