शहापूर तालुक्यात डोळखांब येथे ढगफुटीसदृश अतिवृष्टीची दुर्घटना

5 पर्यटक पुराच्या पाण्यात वाहून गेले; 1 मृत, 1 बेपत्ता, 3 जणांची सुखरूप सुटका

शहापूर | प्रतिनिधी : प्रफुल्ल शेवाळे

ठाणे जिल्ह्यातील शहापूर तालुक्यातील डोळखांब परिसरात रविवारी (दि. 26 जुलै 2026) सायंकाळी ढगफुटीसदृश अतिवृष्टीमुळे मोठी दुर्घटना घडली. मुसळधार पावसामुळे डोंगरातून अचानक आलेल्या पाण्याच्या प्रचंड लोंढ्याने धबधब्याजवळ पर्यटनासाठी गेलेले पाच पर्यटक पुराच्या पाण्यात वाहून गेले.

प्राथमिक माहितीनुसार, हे पाचही पर्यटक कल्याण येथील आधारवाडी परिसरातील रहिवासी असल्याचे समोर आले आहे. दुर्घटनेत एका पर्यटकाचा मृत्यू झाला असून एक जण अद्याप बेपत्ता आहे. उर्वरित तीन जणांची सुखरूप सुटका करण्यात बचाव पथकाला यश आले आहे.

सायंकाळच्या सुमारास डोळखांब परिसरात अल्पावधीत अत्यंत मुसळधार पाऊस झाला. त्यामुळे धबधबा आणि परिसरातील ओढ्यांमधील पाण्याची पातळी काही मिनिटांतच झपाट्याने वाढली. अचानक आलेल्या पुराच्या पाण्यामुळे पर्यटकांना सुरक्षित स्थळी जाण्याची संधीही मिळाली नाही.

घटनेची माहिती मिळताच स्थानिक नागरिक, पोलीस, अग्निशमन दल तसेच आपत्ती व्यवस्थापन पथक घटनास्थळी दाखल झाले. तातडीने राबविण्यात आलेल्या बचाव मोहिमेत तीन पर्यटकांना सुरक्षित बाहेर काढण्यात आले असून बेपत्ता व्यक्तीचा शोध युद्धपातळीवर सुरू आहे.

दरम्यान, हवामान विभागाने ठाणे जिल्ह्यासह परिसरात पुढील काही काळ मुसळधार ते अतिमुसळधार पावसाचा इशारा दिला आहे. या पार्श्वभूमीवर धबधबे, ओढे, नदी-नाले आणि डोंगराळ पर्यटनस्थळांपासून दूर राहावे तसेच पाण्याच्या प्रवाहात उतरू नये, असे आवाहन स्थानिक प्रशासनाने नागरिकांना केले आहे.

डोळखांब येथील ही दुर्घटना पावसाळ्यातील डोंगराळ पर्यटनस्थळांवरील सुरक्षेचा गंभीर प्रश्न पुन्हा एकदा अधोरेखित करणारी ठरली आहे. बेपत्ता पर्यटकाचा शोध सुरू असून संपूर्ण परिस्थितीवर जिल्हा प्रशासनाचे बारकाईने लक्ष आहे.