अडाण नदीच्या पुरात एर्टिगा कार वाहून गेली:आईसह दोन मुलींचा दुर्दैवी मृत्यू!

राजपाल बनसोड प्रतिनिधी दिग्रस 

सलग सुरू असलेल्या मुसळधार पावसामुळे यवतमाळ जिल्ह्यातील नद्या-नाले दुथडी भरून वाहत असताना आर्णी तालुक्यातील एका कुटुंबावर काळाने घाला घातला. दिग्रस तालुक्यातील दहिली (कुपटी) गावाजवळ अडाण नदीवरील पुलावरून पुराचे पाणी वेगाने वाहत असताना एर्टिगा कार प्रवाहात वाहून गेल्याने आई आणि दोन मुलींचा दुर्दैवी मृत्यू झाला, तर कुटुंबप्रमुख अविनाश नामदेव खंडारे यांचा थरारक बचाव करण्यात बचाव पथकाला यश आले.

ही हृदयद्रावक घटना गुरुवार, ३० जुलै २०२६ रोजी मध्यरात्री घडली. अविनाश खंडारे हे पत्नी माधवी खंडारे, मोठी मुलगी प्राची (१७) आणि धाकटी मुलगी साची (१२) यांच्यासह एर्टिगा कारने प्रवास करत होते. दहिली गावाजवळील अडाण नदीवरील पुलावरून पुराचे पाणी वेगाने वाहत असल्याचा अंदाज न आल्याने वाहनाचा ताबा सुटला आणि काही क्षणांतच कार प्रचंड प्रवाहात वाहून गेली.

घटना घडताच परिसरातील नागरिक मोठ्या संख्येने घटनास्थळी धावले. मात्र पाण्याचा वेग प्रचंड असल्याने कोणालाही प्रत्यक्ष मदत करता आली नाही. जीवाच्या आकांताने अविनाश खंडारे यांनी एका झाडाचा आधार घेत मदतीसाठी आर्त हाका मारल्या. माहिती मिळताच पोलीस व बचाव पथक घटनास्थळी दाखल झाले. अथक प्रयत्नांनंतर पहाटे सुमारे साडेतीन वाजता त्यांना सुखरूप बाहेर काढण्यात यश आले.

मात्र या भीषण दुर्घटनेत पत्नी माधवी खंडारे आणि दोन्ही मुली प्राची व साची यांचा पाण्यात बुडून मृत्यू झाला. आपल्या डोळ्यांसमोर पत्नी आणि मुलींना पुराच्या पाण्यात वाहून जाताना पाहण्याची वेळ अविनाश खंडारे यांच्यावर ओढवल्याने संपूर्ण परिसर सुन्न झाला आहे. लोणी गावासह आर्णी आणि यवतमाळ जिल्ह्यावर शोककळा पसरली आहे.शुक्रवार, ३१ जुलै २०२६ रोजी तिन्ही मृतदेह लोणी येथे आणण्यात आले. अत्यंत शोकाकुल वातावरणात तिघांवर अंत्यसंस्कार करण्यात आले. नातेवाईक, ग्रामस्थ, सामाजिक कार्यकर्ते आणि शेकडो नागरिकांनी उपस्थित राहून अश्रुपूर्ण श्रद्धांजली अर्पण केली. संपूर्ण गावात हळहळ व्यक्त होत असून, या घटनेने सर्वांनाच हादरवून सोडले आहे.

दुर्घटनेतील महत्त्वाचे मुद्दे

अडाण नदीच्या पुरात एर्टिगा कार वाहून गेली

आई माधवी खंडारे व मुली प्राची (१७), साची (१२) यांचा मृत्यू

वडील अविनाश खंडारे यांचा थरारक बचाव

रात्री उशिरापर्यंत बचावकार्य सुरू

लोणी गावात शोककळा; अश्रुपूर्ण वातावरणात अंत्यसंस्कार

पूराच्या पाण्यातून पूल ओलांडू नये, प्रशासनाचे आवाहन

"क्षणात उद्ध्वस्त झाला सुखी संसार; पुराच्या प्रवाहाने हिरावले आई आणि दोन निष्पाप मुलींचे जीव, संपूर्ण यवतमाळ जिल्हा शोकमग्न....