सावली तालुक्यात कृषी केंद्र तपासणी जोरात सुरू

दोषी आढळल्यास कृषी केंद्र संचालकांवर होणार कडक कार्यवाही

सावली प्रतिनिधी रोशन बोरकर

शेतीचा हंगाम असल्याने शेतकऱ्यांना शेतीसाठी आवश्यक निविष्ठा बियाणे, खते तर प्रासंगिक निविष्ठा कीटकनाशके तन नाशके इत्यादी मिळण्याचे स्थानिक विश्वासार्ह स्त्रोत हे परिसरातील कृषी केंद्र असतात, मात्र शेतकऱ्यांच्या अज्ञानाचा फायदा घेत निविष्ठा गुणवत्ता, निविष्ठा किमती, साठेबाजी व लिंकिंग बाबत काही ठिकाणी शेतकऱ्यांची निविष्ठा पुरवठा dha धारकांकडून फसवणूक होण्याची शक्यता नाकारता येत नाही. सदर बाबी टाळण्याच्या अनुषंगाने व शेतकऱ्यांना दर्जेदार निविष्ठा योग्य वेळी योग्य दरात मिळावे यासाठी कृषी विभागाने कृषी केंद्र तपासण्या अभियान स्वरूपात सुरू केल्या असून दोषी आढळल्यास कार्यवाही करण्यात येत आहे.

सावली तालुक्यात एकूण ७० कृषी केंद्र असून आतापर्यंत २५ कृषी केंद्राची झाडाझडती घेण्यात आली त्यापैकी ९ कृषी केंद्रांना सुधारणा करने करिता नोटीस देण्यात आले आहे. एका कृषी केंद्रावर कार्यवाही प्रस्तावित करण्यात आली आणि अशी कार्यवाही यापुढे निरंतर सुरू राहणार असल्याची माहिती तालुका कृषी निविष्ठा निरीक्षक श्री. दिनेश पानसे साहेब यांनी दिली आहे. कृषी केंद्र संचालक यांनी नोंदणी प्रमाणपत्राचे अटी व शर्थी तथा कायदेशीर नियमाचे पालन करून शेतकऱ्यांना निविष्ठा पुरवठा करावे.

तसेच खते व निविष्ठा बाबत प्राप्त साठा व त्याची खरेदी देयके, गोदाम व कालबाह्य निविष्ठा साठा, साठा रजिस्टर, ई पास मशीन वरील साठा इत्यादी अद्यावत माहिती ठेवून आवश्यक ते फलक व नोंदणी प्रमाणपत्र दर्शनी भागात प्रदर्शित करणे आवश्यक असल्याचे त्यांनी सांगितले. तसेच शेतकऱ्यांना निविष्ठा मिळण्यास काही अडचण आणि काही तक्रार असल्यास शेतकऱ्यांनी तालुका किंवा जिल्हा तक्रार निवारण समितीकडे तक्रार करावी किंवा कृषी आयुक्तालयाच्या व्हॉट्सअँप ग्रुप वर रीतसर तक्रार करावी अथवा तालुका कृषी अधिकारी सावली कार्यालयास संपर्क करावा असे आवाहन सावली तालुका कृषी विभागाने केले आहे.