आपत्ती काळात नागरिकांच्या सुरक्षिततेला सर्वोच्च प्राधान्य द्या.

अधिकारी, कर्मचाऱ्यांनी मुख्यालय, कामाच्या ठिकाणी २४ × ७ हजर रहा.- जिल्हाधिकारी संतोष पाटील

पाटण येथे जिल्हाधिकारी यांच्याकडून पूरपरिस्थितीची पहाणी 

पाटण (दिनकर वाईकर) 

जिल्ह्यात अतिवृष्टीचा इशारा देण्यात आला असून या पार्श्वभूमीवर तालुका आपत्ती व्यवस्थापन कक्ष २४ × ७ कार्यरत ठेवा. अधिकारी, कर्मचाऱ्यांनी मुख्यालय, कामाच्या ठिकाणी २४ × ७ हजर रहा. येणाऱ्या प्रत्येक कॉलला सकारात्मक प्रतिसाद द्या. पूरपरिस्थितीत बाधित होणाऱ्या प्रत्येक कुटुंबाला आवश्यकता भासणाऱ्या ठिकाणी नागरिकांचे व पशुधनाचे तातडीने स्थलांतरण करा आणि अनुषंगिक सुविधांची आवश्यक ती उपलब्धता ठेवा. नागरिकांच्या सुरक्षिततेला सर्वोच्च प्राधान्य द्या.   नदीकाठच्या गावांनी सतर्कत बाळगून नागरिकांनीही पुराच्या पाण्यात जाणे टाळावे असे निर्देश जिल्हाधिकारी संतोष पाटील यांनी दिले. 

      जिल्हाधिकारी संतोष पाटील यांनी पाटण तालुक्यातील पूरपरिस्थितीची पाहणी केली त्यावेळी ते बोलत होते. यावेळी पाटणचे प्रांताधिकारी टोम्पे, तहसिलदार गुरव महसूल, आरोग्य, वन विभागाचे अधिकारी, कर्मचारी ग्रामस्थ उपस्थित होते. 

          जिल्हाधिकारी संतोष पाटील यांनी पाटण तालुक्यातील नावडी, मंद्रुल हवेली, पाटण, हेळवाक या ठिकाणी पूरस्थितीची पाहाणी केली यावेळी ते बोलताना म्हणाले धरणांच्या पाणलोट क्षेत्रात पावसाचा वाढता जोर पाहता कोयनेसह सर्व धरणातील विसर्ग वाढवावा लागू शकतो. कोयना, कृष्णाच्या अनुषंगाने पाटण कराड तालुक्यांनी विशेष दक्ष राहावे, सतत पाऊस सुरु असल्याने जेवढी पाण्याची आवक आहे तेवढे पाणी सोडले जात आहे. धरणांची साठवण क्षमता संपुष्टात आली आहे त्यामुळे कोयना धरणातून एक लाख क्युसेकने पाणी सोडले जाऊ शकते. अशा परिस्थितीत जी कुटूंबे बाधित होतात अशी कुटूंबे तात्काळ स्थलांतरीत करावीत. तसेच जे रस्ते व पुलांवर पाणी येऊन वाहतूकीसाठी बंद झाले आहेत त्याची माहिती ताबडतोब जिल्हा प्रशासनाला द्यावी. दरडप्रवण गावात तलाठी ग्रमासेवक यांनी फिल्डवर जाऊन पाहणी करावी व लोकांशी संवाद साधावा. वैद्यकीय असणारे रुग्ण, गरोदर महिला अशा रुग्णांची माहिती संकलीत करुन ठेवावी. विशेषत: महाबळेश्वर, जावळी, पाटण या भागात अधिक दक्षता घ्यावी. जिल्ह्यात धबधब्यांची संख्या मोठ्या प्रमाणावर असून अशा ठिकाणी पर्यटक अडकले असल्यास माहिती घ्यावी, ज्या बसस्थानकांना पुराच्या पाण्याचा फटका बसतो अशा ठिकाणी प्रवासी अडकले आहेत का याची शहानिशा करावी, आणि अशी स्थिती असल्यास अशा प्रवाशांची गैरसोय टाळण्यासाठी आवश्यक ती कार्यवाही करावी.