​दौंडमध्ये रेल्वे अपघाताची अफवा; यंत्रणांची सज्जता तपासण्यासाठी राबवले 'मॉक ड्रिल'.

गणेश गावडे-पाटस प्रतिनिधी

​सोशल मीडियावरील व्हिडिओज आणि फोटोंमुळे तालुक्यात भीतीचे वातावरण; प्रशासनाकडून सतर्कता चाचणीचा खुलासा.

​दौंड: दौंड रेल्वे स्थानक परिसरात शुक्रवारी रेल्वेचा भीषण अपघात झाल्याची चर्चा वाऱ्यासारखी पसरल्याने नागरिकांमध्ये मोठी खळबळ उडाली. अचानक वाजणारे आपत्कालीन सायरन, रुग्णवाहिकांचा वेगवान आवाज आणि रेल्वे रुळांजवळून निघणारे धुराचे लोट यामुळे शहरवासी भयभीत झाले होते. मात्र, प्रत्यक्षात हा कोणताही अपघात नसून रेल्वे प्रशासन आणि एनडीआरएफने (NDRF) संयुक्तपणे घेतलेले 'मॉक ड्रिल' असल्याचे स्पष्ट झाले आहे.रेल्वे प्रवासादरम्यान अचानक उद्भवणाऱ्या आपत्कालीन परिस्थितीला तोंड देण्यासाठी प्रशासनाकडून वेळोवेळी अशा चाचण्या घेतल्या जातात. 

शुक्रवारी सकाळी दौंड स्थानकावर डबे घसरल्याचे आणि आग लागल्याचे कृत्रिम दृश्य तयार करण्यात आले होते. अपघाताची माहिती मिळताच सर्व यंत्रणा किती वेळात प्रतिसाद देतात आणि बचावकार्य कसे करतात, हे तपासणे या सरावाचा मुख्य उद्देश होता.​सराव सुरू असतानाचे काही व्हिडिओ आणि फोटो सोशल मीडियावर वेगाने व्हायरल झाले. यामुळे "दौंडमध्ये मोठा रेल्वे अपघात झाला" अशा बातम्या पसरून संपूर्ण तालुक्यात चिंतेचे वातावरण निर्माण झाले. प्रवाशांच्या नातेवाईकांकडून रेल्वे प्रशासनाला मोठ्या प्रमाणात फोन येऊ लागले होते. मात्र, प्रशासनाने हा केवळ सराव असल्याचे जाहीर केल्यावर सर्वांनी सुटकेचा नि:श्वास सोडला.​ या सरावामध्ये रेल्वे सुरक्षा बल (RPF), रेल्वे पोलीस (GRP), स्थानिक प्रशासन आणि NDRF च्या पथकाने सहभाग घेतला. अत्यंत कमी वेळात ढिगारा बाजूला करणे आणि जखमींना बाहेर काढणे याचे प्रात्यक्षिक यावेळी सादर करण्यात आले. अशा सरावांमुळे प्रत्यक्ष संकटाच्या वेळी यंत्रणांमधील समन्वय वाढण्यास मदत होते, असे रेल्वेच्या वरिष्ठ अधिकाऱ्यांनी स्पष्ट केले.