खासदार संजय देशमुख यांच्या वाहनाला भीषण अपघात; सुदैवाने मोठी जीवितहानी टळली

(वाशिम प्रतिनिधी: .ओंकार पुरी)

दिग्रस (वाशीम): शिवसेना (उद्धव बाळासाहेब ठाकरे) पक्षाचे यवतमाळ-वाशीम लोकसभा मतदारसंघाचे खासदार संजय देशमुख यांच्या वाहनाला भीषण अपघात झाल्याची घटना समोर आली आहे. दिग्रस-पुसद मार्गावरील साखरा गावाजवळ एका भरधाव टिप्परने त्यांच्या कारला जोरदार धडक दिली.

नेमकी घटना काय?

मिळालेल्या माहितीनुसार, खासदार संजय देशमुख एका सार्वजनिक कार्यक्रमावरून परतत असताना साखरा गावाजवळ हा अपघात घडला. एका अनियंत्रित टिप्परने (ट्रक) खासदारांच्या वाहनाला धडक दिली, ज्यामध्ये त्यांच्या वाहनाचे मोठ्या प्रमाणावर नुकसान झाले आहे.

खासदारांची प्रकृती स्थिर

सुदैवाने, या भीषण अपघातातून खासदार संजय देशमुख थोडक्यात बचावले असून त्यांना किरकोळ दुखापत झाली आहे. अपघातानंतर त्यांना तात्काळ दिग्रस येथील म्हात्रे रुग्णालयात उपचारासाठी दाखल करण्यात आले. प्राथमिक उपचारानंतर त्यांची प्रकृती आता स्थिर असल्याची माहिती वैद्यकीय सूत्रांनी दिली आहे.

या घटनेची माहिती मिळताच त्यांच्या समर्थकांनी आणि कार्यकर्त्यांनी रुग्णालयाबाहेर मोठी गर्दी केली होती. पोलीस या प्रकरणाचा अधिक तपास करत असून अपघातास कारणीभूत असलेल्या ट्रक चालकावर कारवाईची प्रक्रिया सुरू आहे.