प्रशासन झोपेत?-अमळनेरमध्ये धुळे रोडवर डंपरचा कहर; तरुणाचा मृत्यू.

अमळनेरमध्ये धुळे रोडवर डंपरचा कहर; तरुणाचा मृत्यू, प्रशासन झोपेत?

अमळनेर शहरातील अत्यंत वर्दळीचा मानला जाणारा धुळे रोड सध्या रेतीच्या डंपरमुळे मृत्यूचा सापळा बनत चालला आहे. गेल्या काही महिन्यांपासून या रस्त्यावर रेती वाहतूक करणाऱ्या डंपरची संख्या प्रचंड वाढली असून दिवसाला तब्बल ४०० ते ५०० डंपर या मार्गाने शहरातून जात असल्याचे स्थानिक नागरिक सांगत आहेत. या सततच्या आणि बेफाम वाहतुकीमुळे नागरिकांमध्ये भीतीचे वातावरण निर्माण झाले आहे.

आज दुपारी या धुळे रोडवर घडलेल्या दुर्दैवी अपघातात एका तरुणाचा जागीच मृत्यू झाला. या घटनेमुळे संपूर्ण शहरात संतापाची लाट उसळली आहे. स्थानिक नागरिकांचा प्रश्न आहे की, इतक्या मोठ्या प्रमाणात रेतीचे डंपर शहराच्या मुख्य रस्त्यावरून कोणाच्या आशीर्वादाने धावत आहेत?

धुळे रोड हा शहरातील महत्त्वाचा मार्ग असून येथे शाळा, दुकाने आणि रहिवासी भाग मोठ्या प्रमाणात आहेत. तरीही अवजड डंपरची सततची वर्दळ सुरू असल्याने अपघाताचा धोका दिवसेंदिवस वाढत आहे. नागरिकांचे म्हणणे आहे की, अनेक डंपर अतिवेगाने आणि नियम धाब्यावर बसवून शहरातून जातात. त्यामुळे पादचारी, दुचाकीस्वार आणि सामान्य वाहनचालकांचे जीव अक्षरशः धोक्यात आले आहेत.

सर्वात मोठा प्रश्न असा उपस्थित होत आहे की, दिवसाला शेकडो डंपर शहरातून जात असताना प्रशासनाचे याकडे दुर्लक्ष का? इतक्या मोठ्या प्रमाणात वाहतूक सुरू असताना वाहतूक विभाग, महसूल विभाग किंवा पोलीस प्रशासनाने यावर नियंत्रण का आणले नाही?

आज एका तरुणाचा जीव गेला आहे. पण हा जीव गेल्यानंतर तरी प्रशासन जागे होणार का? की अजून किती निष्पाप नागरिकांचे जीव गेल्यावर या बेकायदेशीर आणि बेफाम डंपर वाहतुकीवर आळा बसणार?

अमळनेरकर नागरिक आता थेट प्रश्न विचारत आहेत —

हे डंपर नेमके कोणाच्या आशीर्वादाने चालू आहेत?

आणि प्रशासनाला हे खरोखरच दिसत नाही का, की कोणाच्या दबावाखाली डोळेझाक केली जात आहे?

आजची ही घटना केवळ एक अपघात नसून प्रशासनाच्या दुर्लक्षाचा गंभीर परिणाम असल्याची भावना नागरिकांमध्ये व्यक्त होत आहे. आता तरी प्रशासनाने तात्काळ कारवाई करून शहरातील या डंपर वाहतुकीवर कठोर निर्बंध घालावेत, अशी जोरदार मागणी नागरिकांकडून होत आहे.